3073. Quod `in hoc cognoscam, quod fecisti misericordiam cum domino meo' significet quod ex amore Divino conjugium, constat ex significatione `misericordiae' quod hic in sensu interno sit amor Divinus, de qua n. 3063; et quia agitur de desponsatione Rebeccae cum Jishako, hoc est, de conjunctione Divini Veri cum Divino Bono Rationalis, per `facere misericordiam cum domino meo' non aliud significatur quam conjugium, ita conjugium ex amore Divino; est etiam hoc conclusum supplicationis ejus, ac finis propter quem.