Vers. 1-3. Et congregavit Moscheh omnem coetum filiorum Israelis, et dixit ad illos, Haec verba quae praecepit Jehovah ad faciendum ea. Sex diebus fiet opus et in die septimo erit vobis sanctitas, sabbatum sabbati Jehovae; omnis faciens in illo die opus morietur. Non accendetis ignem in omnibus habitationibus vestris in die sabbati. `Et congregavit Moscheh omnem coetum filiorum Israelis' significat omnia vera et bona Ecclesiae in complexu: `et dixit ad illos, Haec verba quae praecepit Jehovah ad faciendum ea' significat instructionem de primario Ecclesiae ad quod omnia se referunt: `sex diebus fiet opus' significat statum primum regenerationis hominis a Domino, et in supremo sensu glorificationis Humani Domini: `et in die septimo erit vobis sanctitas, sabbatum sabbati Jehovae' significat alterum statum regenerationis hominis cum ei conjunctio cum Domino, et in supremo sensu unionem Humani Domini cum ipso Divino: `omnis faciens in illo die opus morietur' significat mortem spiritualem illis qui ducuntur a se et suis amoribus, et non a Domino: `non accendetis ignem in omnibus habitationibus vestris in die sabbati' significat quod nihil amoris proprii, qui est sui et mundi, (tunc) in omnibus et singulis hominis quae a Domino, apparere debeat.