1050. "Et ex sanguine testium Jesu."--Quod significet violentiam illatam illis veris Verbi, quae docent quod Dominus solus adorandus sit, constat ex significatione "sanguinis," quod sit Divinum Verum Verbi, et violentia ei illata (ut mox supra); et ex significatione "testium Jesu," quod sint qui corde agnoscunt Dominum et Ipsum solum colunt et adorant; quod "testari" sit agnoscere corde, et quod "testimonium Jesu" sit agnitio Divini Domini in Humano Ipsius, et quod Ipse solus colendus et adorandus sit, videatur (supra) (n. 10, 27, 228, 392(b-e), 635, 649, 749). Quod veris Verbi, quae docent Dominum, a Babylonicis violentia illata sit, manifeste patet ex eo, quod Divinam Domini potestatem in Papam, ut vicarium Ipsius, transtulerint, et cum illa simul cultum et adorationem; et quod propter illum finem separaverint Divinum Domini ab Humano Ipsius, ut dicere possent quod non Divinam Ipsius potestatem, sed Humanam Ipsius, susceperint, non volentes scire quod Divina potestas principaliter consistat in potestate salvandi genus humanum, quam potestatem usque Babylonici sibi appropriant. Sed de hac re plura alibi dicentur.
[2] (Continuatio de Profanatione.) Causa tam horrendi status profanatorum post mortem etiam detegetur. Sunt homini binae mentes, naturalis et spiritualis. Mens naturalis ei aperitur per scientias et cognitiones veri et boni, et mens spiritualis aperitur per vitam secundum illas, quod fit apud illos qui vera Verbi sciunt, agnoscunt et credunt, ac secundum illa vivunt; illa mens non apud alios aperitur. Quando mens spiritualis aperta est, tunc lux caeli, quae est Divinum Verum, per illam in mentem naturalem influit, et ibi disponit vera ad correspondentias. Cum ergo homo in contrarium abit, et vera Verbi prius agnita negat vel fide vel vita, tunc illa quae in naturali mente sunt non correspondent amplius illis quae in mente spirituali sunt; inde caelum ex sua luce per mentem spiritualem influit in non correspondentia, et in eis opposita in naturali homine, ex quo existit phantasia tam dira ut videantur sibi volare in aere sicut dracones, utque flocci et paleae appareant eis sicut gigantes et turmae, ac orbiculus sicut universus orbis, et similia plura. Causa itaque est quod caelum eis sit in mente spirituali, ac infernum in mente naturali; et cum caelum, quod in mente spirituali est, agit in infernum quod in mente naturali est, tunc apparent talia. Quia sic intellectus quoad omnia sua destruitur, et cum intellectu etiam voluntas, inde homo non fit homo magis: ex eo est quod profanus non amplius dicatur homo, nec ille aut illa, sed illud, est enim brutum.
This page is part of 
© 2000-2001 The Academy of the New Church