1036. VERSUS 3-5. "Et detulit me in desertum (in) spiritu, et vidi mulierem sedentem super bestia coccinea, plena nominibus blasphemiae, habente capita septem, et cornua decem. Et mulier circuminduta purpura et coccino, et inaurata auro, lapide pretioso, et margaritis, habens aureum poculum in manu sua, plenum abominationibus et immunditie scortationis ejus. Et super fronte ejus nomen scriptum, Mysterium, Babylon magna, mater scortationum et abominationum terrae." 3. "Et detulit me in desertum in spiritu," significat in locum in visione apparentem, qui correspondebat statui illius religiosi (n. 1037); "et vidi mulierem sedentem super bestia coccinea," significat dominium illius religiosi super sancta Verbi (n. 1038); "plena nominibus blasphemiae," significat quae adulterata et falsificata (n. 1039); "habente capita septem," significat et profanata (n. 1040); "et cornua decem," significat potentiam Verbi ex veris (n. 1041). 4. "Et mulier circuminduta purpura et coccino," significat apparentiam religiosi istius in externis, sicut foret ex caelesti bono et vero, cum tamen in internis est ex diabolico malo et falso (n. 1042); "et inaurata auro et lapide pretioso," significat apparentiam religiosi istius in externis sicut foret ex spirituali bono et vero, cum tamen in internis est ex infernali malo et falso (n. 1043); "et margaritis," significat apparentiam in externis sicut foret in cognitionibus boni et veri (n. 1044); "habens aureum poculum in manu sua, plenum abominationibus et immunditie scortationis ejus," significat doctrinam ex profanatis bonis et veris (n. 1045). 5. "Et super fronte ejus nomen scriptum, Mysterium, Babylon magna," significat in corde amorem dominii super mundum et caelum, cui sancta Verbi, ecclesiae et cultus inservirent pro mediis (n. 1046); "mater scortationum et abominationum terrae," significat religiosum, ex quo adulterationes boni et veri et profanationes sanctorum ecclesiae (n. 1047).