807. (Vers. 3.) "Et secundo dixerunt, Alleluja; (et) fumus ejus ascendit in saecula saeculorum," significat ex gaudio gratiarum actionem et celebrationem Domini, quod prophanum illud Religiosum damnatum sit in aeternum. - Quod "secundo dixerint," est ex varia affectione gaudii, quod liberati sint ab infestatione ex illis qui in illo Religioso erant, tum ex timore ne resurgant et iterum infestent; quod per "Alleluja" significetur gratiarum actio et celebratio Domini, videatur supra (n. 803); per "fumum ejus" significatur Religiosum illud quoad diras ejus falsitates, quoniam falsa ex malo apparent sicut fumi ex igne (n. 422); ignis ibi est amor sui (n. 468, fin., 494, 766); quod per "fumum combustionis," ubi de Babylone, significetur prophanatio (n. 766, 767); per "ascendere in saecula saeculorum" significatur damnatio ejus in aeternum.